النقاش الجاد والحوار الهادف - التسلية والترفيه - الثقافات والفنون - الادب والعلوم - الاشعار والاقوال المأثورة - الالعاب والضحك والفرفشة - اغرب الصور واجملها - احدث الافلام العربيه والغربيه * نعدكم بكل ماهو جديد & طريف & جميل & وممتع
 
الرئيسيةالبوابةالتسجيلدخول
التبادل الاعلاني
احداث منتدى مجاني
بحـث
 
 

نتائج البحث
 
Rechercher بحث متقدم
عيد سعيد
المواضيع الأخيرة
» قصة شاب اخرج قلب امه؟
الخميس 31 ديسمبر 2009, 6:51 am من طرف orignal_ms

» اضحك براحتك
الجمعة 20 نوفمبر 2009, 12:17 pm من طرف islam

» صوت صفير البلبل
الجمعة 20 نوفمبر 2009, 11:56 am من طرف islam

» ال بيقولو الوحدة العربية
الخميس 19 نوفمبر 2009, 11:20 pm من طرف islam

» مصر والجزائر معركة ضارية أم ماتش كورة
الأربعاء 18 نوفمبر 2009, 8:38 pm من طرف islam

» مقتل خفير
الأربعاء 18 نوفمبر 2009, 12:45 pm من طرف islam

» مسرحية عمار يا مشمش
الأربعاء 11 نوفمبر 2009, 5:23 pm من طرف islam

» سألوني عنك
الأربعاء 11 نوفمبر 2009, 5:10 pm من طرف islam

» برنامج فتح المواقع المحجوبة – المحظورة وتجوز مراقبة مزود الخدمة لديك
الأربعاء 11 نوفمبر 2009, 3:30 am من طرف nor_han

» حصري وعلى منتدانا اسطوانة تجميعية لمجموعة من البرامج
الثلاثاء 10 نوفمبر 2009, 7:17 pm من طرف islam

» يقولون عنها
الأحد 08 نوفمبر 2009, 5:33 pm من طرف islam

» شرح أدوات الفوتوشوب للمبتدئين
الثلاثاء 03 نوفمبر 2009, 2:55 pm من طرف islam

» الكتاب العربي لتعليم sketch up
الثلاثاء 03 نوفمبر 2009, 2:46 pm من طرف islam

» رثاء نفسي
الثلاثاء 03 نوفمبر 2009, 2:36 pm من طرف islam

» زوجتي يا زوجتي
الثلاثاء 03 نوفمبر 2009, 2:30 pm من طرف islam

عيد سعيد
أفضل 10 أعضاء في هذا المنتدى
islam
 
_el_abkareno_
 
habibe_elawalany
 
nor_han
 
ALyamany
 
haydy
 
مازن
 
A7MED_ZERO
 
7wuda
 
الطائر الحزين
 

شاطر | 
 

 مسرحية عمار يا مشمش

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
islam
۩ ۩ المدير العام ۩ ۩
۩ ۩  المدير العام  ۩ ۩
avatar

ذكر الأوسمة :

عدد المساهمات : 370
السٌّمعَة : 23
تاريخ التسجيل : 30/07/2009
العمر : 29
الموقع : http://aktrminakhwat.yoo7.com

مُساهمةموضوع: مسرحية عمار يا مشمش   الأربعاء 11 نوفمبر 2009, 5:18 pm

مسرحية
عمار يامشمش
السيد سعيد علام
مفتتح قبل الظهور على المسرح :
(سمع هس ياجمهورنا المستوى .. شخصيات مسرحيتنا منقصدش بيها حد معين ، انما هي مطعومه من شجرة العمار .. يعني مافيش حد يجمع المشمشه تو ما تخوص ويعبيها في تكنه حد هي فلكلور عماراوي واللي عايز يودي مشمشه المصنع يستني للاخر بس قبل النقطه ماتنزل).
الاشخاص حسب الظهور :
ابويوسف: رجل في عقد الاربعينات له ولد وبنت
يوسف :طفل عمره خمس سنوات
بشري :عامله في جنينة المشمش
اشرف: شاب حاصل علي دبلوم صنايع ويجمع المشمش
المتسول :رجل يتجول في القري حسب موسم كل قرية
نفيسه :بائعة مشمش
شعبان :فلاح
عبدالعزيز: شخص يقف علي المزاد بين التجار
عدد من التجار
عادل : صاحب السويقة يجمع الارضية من البائعين
فلفل :بائع الصحف
5اشخاص يمرون امام ابو يوسف في المشهد الثاني يعددوا اسباب تلف محصول المشمش
المشهد الاول
(صالة بيت ريفى .. حائط أمامى . بابين يمين وشمال..كنبة مستندة على الحائط فى المنتصف بجوارها مقطف وعدد من كراتين المشمش .. حصيرة مفروشة على الارض)
يدخل ابو يوسف من الباب الايمن ويبدا فى الكلام
ابو يوسف: من ساعة ما الديك يدن والنهار يشقشق ، والنفر ما بيهمدش فى الشهر المبروك ده .. انشاء الله علينا وعلى البلد كلها فى طرحه وسعره .. كل حركة فيه بركة وبتمنها .. مليان خير كتير .. عيد لينا وللاولاد والبلد كلها فوق العيدين .. دا حتى الولية حماتى اللى الروماتيزم مكسحها تلاقيها زى الرهوان فيه و لاتشتكى ابدا من رجلها الا بعد ماتصرف القرشانات .. ما صحيح الفلوس بتقوى القلب والجتة.
يصمت متذكرا:
ابو يوسف:هو الواد يوسف لسة مصحيش ولا ايه ( يرفع صوته عاليا) اصحى يا واد ياييوسف ، هى امك سابتك نايم .. وسعادتك بيقيت خم نوم كده ليه ..ياييييييييييييوسف
يخرج يوسف من الباب الايسر .. متثائبا ، يفرك فى عينيه
ابو يوسف:صباح الخير ياحبيبى .. ايه القمر ده..طبعا ياعم مبسوط لا فيه الشيخ بشير ولا حضانة ولا واجب ولاغيره.. هيص بقى الشهر ده.
يوسفL:يعنى شايفنى باصحى الضهر يعنى ، ما انتو مصحينى من النجمة ، هى ام يوسف راحت فين.
ابو يوسف:يعنى معتز باسمك قوى ، متقولش ام الخلول ياخى .
يوسف:اهو برضة اسم جدى مش عاجبك ولا ايه
ابو يوسف:طب يالمض ،خدت المشنة من الفجرية وراحت لطابونة محمد بربش قبل ماتتزحم بالنسوان والرجالة .
يوسفL:(ملوحا بيده) ياعم تلاقيهم بايتين على بابها ، مش عارف مبترحمش نفسها ليه وتخبز هنا العيش اللى بحبه .
ابو يوسف:طب يالمض عيش الطابونة ارخص واوفر وحلو للفطاروالباقى ينفع الفراخ والعجلة وبعدين فى الغدا ماانت بتحش مشنة منه .. بس اياك عماد يرحمها من معركة الزحمة اللى من غيرطوابيرويمشيها بسرعة عشان تلحق تلهف كيس الطعمية وكيس الفول من عند ستك فهيمة ربنا يديها الصحة ، مافيش احلى من طعميتها وفولها ، وكمان تعدى على فردوس تنقى خضار الغدا اللى جابته من بنها ، ما هى بلدنا مابقاش في ارضها اكل للبهايم ولا البنى ادمين .. مفيش غير شجر مشمش واراضى بور اتبنت ولا هتتبنى مستنية محضر الجمعية .. عشان كده تلقيه مولع .
يهم ابو يوسف خارجا من الباب الأيسر تاركا يوسف على المسرح
يوسفL: امال انت رايح فين مش هتستناها لحد ما ترجع
ابو يوسف:لا ياسدى انا هااخش احل العجلة واخدها افطرها واجهز عشاها من قصبتين البرسيم اللى اشتريتهم من عند سيدك منصور عشان اطرى بطنها بيهم وبعدين الحقكم على ساقية الشوادلية( يتذكر مستديرا ليوسف بالكامل) بس باقولك ايه ياعم يوسف بلاش نشوفية الدماغ والعفرتة وتتحكم على امك تسوق العربية الصاج بالحاجات ، سيب امك تسوقها ، كفاية المشاكل اللى عملتها
يوسفL:(مشوحا بيده) مشاكل ايه ياعم.. سيبك وقول ياباسط يا ابويوسف ياعسل انت .. روح بس ياعم روح وحط فى بطنك بطيخة صيفى.
ابو يوسف: ايه اللى انت بتقوله ده هو انت ناسى البت اللى خبطها اول امبارح ولا ايه
يوسفL: ياعم هى اللى كانت مسطولة ، ما انا ياما ضربت لها كلكسات .. باين كان عليها طرشة وبعدين ايه يعنى حادثة واحدة ما سواقين بلادنا بيعملوا بلاوىوهو انت اتنجيت منهم فاكر خرشمة دراعك ووشك
ابو يوسف:ياسلام بقى مش فاكر حادثة الاسبوع اللى فات ولا...ولا....
يوسفL (يدفع ابوه برفق نحو الباب) ياعم روح واطمن ، وهما الرجالة اللى لازم تسوق ، ولا عاوز الحريم هى اللى تسوقنا ويقول الناس زى ما بتعمل مع ابنه بتعمل معاه.. روح يا ابو يوسف روح.. طريقك زراعى .
ابو يوسف (مندهشا من كلامه): وله نفسى اقطع من لسانك مترين ، انت طالع لمض لمين وبتجيب الكلام الكبير عليك منين صحيح العيال مبقتش عيال دول بقو قرود ..بقى كده ياعم يوسف
(يرفع ابنه على كتفه وينزله مداعبا مكملا كلامه ) طب انا ماشى بقى واسمع كلام امك وابعد عن جسر الترعة بالعربية وانتو جايين (يخرج متمتما) يلا .. يافتاح ياعليم .. يارزاق ياكريم ، توكلنا على اللى بياكلنا
(يبقى يوسف متزمرا وحده فى صالة البيت)
يوسفL: الواحد هيعقد يشتغل لهم طول العمر ، حاجة تقرف ، انا هادخل اعسل شوية لغاية لما تيجى ام يوسف وعلى سريرها واسع وبرح الواحد يتقلب براحته ، مش سريرى الواحد لو خد براحه ينهدر على الارض
(يدخل يوسف من الباب الايمن للصالة ويخلو المسرح)
المشهد الثاني
(مقطع من جنينه مشمش في منتصفها هيكل لشجره ونقال في يمين المسرح مسافه لكرسين سيضعهما في وقت تذكر فرح سعيد وفي الشمال رقيه (خشب متقطع) بجواره ترمس وبراد ومج بايد
يدخل ابو يوسف من الجهه اليمني ليجد بشري في منتصف المسرح حامله غلق مشمش
ابو يوسف: السلام عليكم
بشري: وعليكم السلام هو انت عوقت كده ليه ده يوسف وام يوسف جم من بدري
ابو يوسف: معلش العجله غلبتني في السكه شويه والحج عبد المقصود اخرني شويتين
يوسفL: هيييييييييييييييييييييييه الدفتر انشال وهتمضي تاخير
ابو يوسف:هتبقي انت والمدير كفايه عليا واحد بس .. هيييييييييييييييه عملت كام حادثه النهارده
يوسفL: عيب ده انا معايا رخصه درجه اولي ممتاز
ابو يوسف:موجها كلامه لبشري هو الواد اشرف لسه ماجاش
بشري: لأ.. احسن ناموسيته كانت كحلي
دخول اشرف من جهه اليمين لابس الجلابيه الصوف علي القفطان والشال بقصه شعره
أشرف : صباح الخير
ابو يوسف:صباح الخير الظهر
أشرف : وحياه ابوك بلاش تريقه الساعه ماجتش 11 علشان تقول كده هو لسه الندي طار ولا يكونش السوايق بتشطب بدري ماتوجعش قلبي ع الصبحيه
ابو يوسف:انا هاقعد استني لما تصحي لي الساعه 11 لما يطير الندي ويطير رزقي معاه ايه اللي اخرك؟ ده انت لسه هتتسمم تفطر غير السجاير والشاي
أشرف : اصلي مانمتش بالليل امبارح
ابو يوسف:حد حاشك ولا تلاقيك علي قهوه الدش تتفرج ع الافلام الثقافيه اياها ولا تلعب اتاري ولا تستني فيلم السهره اللي بيجي اخر الليل
أشرف : وبعدين بقي
لحظه صمت ثم يقترب ابو يوسف من اشرف متحسسا طوق الجلابيه الصوف والقفطان والشال
ابو يوسف:اش اش حته صوف متفلقه علي قفطان ابيض وشال من الحجاز وشعر مسبسب شيخ عرب ياخي ده انت بقي بتصحي من الفجريه وتقف تتزوق بالساعات قدام المرايا زي البنات بكره تيجلي بفوق الركبه وبدي واسترتش وتجيب لك حته محمول ماهو رخص وبقي بالتقسيط ماهو الفلاح لما يتمدن بيجيب لاهله العار
أشرف : لا سيدي انت اللي محتاج محمول علشان تضرب ع السويقه تعرف الاسعار وبعدين وهو انت ناسي ولا ايه دا انا ابو علام برضه مش معني ان كل الناس شالته اجيبه انا لى دماغ لوحدى
ابو يوسف:ياخي روح اتلهي شوف معاك ايه وتعالي اتكلم
أشرف : لا برده ع الاصل دور
ابو يوسف:طب يلا بلاش غلبه ويلا اخلع الهلاهيل دي وألبس الزكته والايش وتعالي نشق ريقنا ونفطر ونشرب الشاي عقبال مايطير الندي
يخرج اشرف من المسرح ويعود لابسا الزكته اثناء تجهيز الافطار
ابو يوسف:الا قولي هما سموك ابو رغوه ليه تكونش علشان بترغي في الكلام كتير وبتهري اكتر
أشرف : وبعدين بقي ده النهار لسه مابتداش ياسيدي طلعت عليا علشان دايما باطلب شاي برغوه يعني لازم ترفع البراد قوي فوق الكبايه علشان يتوشش بالرغوه هي دي افيونه الشاي عندي ارتحت بقي ياسيدي
ابو يوسف: افيونه ايه ياواد تكونش بتضرب بانجو مع شله الصيع اللي في البلد
أشرف : (ملوحا بيده) بانجو ايه ياعم ولا البنج اللي بياخدوه ده كيف مش زيك لا سجاير ولا معسل وباين عليك واخد علي شرب الطبيخ (يمد اشرف يده للامام مع تصفيقه عاليه وبصوت عالي) وعلي رأي يوسف شتا عم الموال غرقتني بيره ياحموده ده راس بدون كيف تستحق السيف
ابو يوسف: طيب يا كييف عقبال ماتبقي مدمن
يهم ابو يوسف بصب الشاي من الترمس في المج
أشرف : انت بتعمل ايه ياعم انا عايز شاي ركيه صافي يتصب في كبايه ازاز اشرب فيها مش شاي بايت ومج عامل زي الزلعه
ابو يوسف احنا فاضيين مش كفايه جاي متاخر ودي حاجه لزوم الفطور تيك اواي ، خليه للغدا
أشرف : اشمعني دي اللي لحقها التطوير طب مافيش حاجه غير السيبه اللي بيتنصب عليها السلم دي فكره من ايام قدماء المصريين
ابو يوسف:هو كان علي ايامهم زنزلخت ياخي
أشرف : انا سمعت ان في لبنان بيجمعو التفاح بالسلم الكهربائي
ابو يوسف:ناقص تقولي كوبري معلق بدل فلق النخل وتملس بايدك علي الترابزين الالومنيوم وانت ماشي ورا البنات الصبايا اللي شايله المشمش الموردن او المهرمن
أشرف : طب وماله ماهي المسقه اتبنت واتمحرت والمسيب بقي حديد والكهربا دخلت الغيطان ونورت الخص وشغلت الغسالات والتليفزيونات في العب دكه والناس بتسهر قدامها لعز الفجر
ابو يوسف:وماله ياخويا وانا من بكره اخصخصك واديك معاش مبكر ماانا هابقي عايزك في ايه طالما كل حاجه بالتكنولوجيا كده
أشرف : بقي كده تهون عليك العشره الهباب وايام العذاب طب هات جواباتي وصوري
ابو يوسف:انت هتنكت قوم بينا نشوف ورانا ايه قبل الشمس ما تبقي قدحه والسويقه تتردم مشامش لا نعرف نجمع ولا نعرف نبيع يلا غب البقين اللي فاضلين انت هتخمس في كبايه الشاي بقية النهار ولا ايه
أشرف : باقولك ده مزاج كيف يعني مش انت
ابو يوسف:جول ياعم جول يلا .. ياروح اهلك ماأنت بتلهف نص باكو وغدوه بظفر وعلبه دخان كل يوم علشان تقعد تتمزج لي في كبايه الشاي وتحبس بسجاير
بشري: ماتقوم ياواد يابارد انت الواحد ماتهدش من الصبحيه لميت اللي تحت السجر ومليت الطشت من الطرنبه وعملت الشاي
أشرف : وانتي مالك يابت انتي انتي فاكره نفسك حاجه
ابو يوسف:بلاش منهاده ع الصبح يلا انصب السيبة ع السجره الحمويه عقبال ما اجيب النقال من الراس دكها لبز اسماعيل اللي جنبها انت عارف ايه اللي ورانا النهارده
أشرف : اشمعني مهتم بالسجرتين دول عن بقية الغيط
ابو يوسف:علشان ربنا يكرمنا ونلم مديونية البنك اللي اتجوزت بها البت سعيدة اصل كان عريسها مستعجل ومايهموش عوايدنا في الجواز بعد المشمش لما نلم المحصول ونتحين
اغنيه هات لي بوتجاز.. في المشمش.. وسرير هزار.. في المشمش .. طب لمبه جاز.. في المشمش شاله يا جواز.. على المشمش
(استطراد لابو يوسف) انت عارف ان البنات عليها عفريت وخراط البنات خرطها بسرعه وجابت الواد علي ملي وشه من اخر الدنيا
أشرف : ياسلام
ابو يوسف:عجبه اخلاقها والوش الابيض اللي زي القشطه والعيون الخضر بلون البرسيم والواسعه زي عيون البقر والشعر اللي زي سنابل القمح والخدود اللي ولا خد مشمشه السجره البدريه احلي من خد التفاح
أشرف : طالما زي التفاح يبقي لازمه السلم الكهربائي علشان نجمعه
ابو يوسف:لما يبقي السعر واحد نجيب السلم الكهربائي ونديك استماره ستة
أشرف : اشمعني رحت للبنك جبت سلفه منه بالفايظ
ابو يوسف:انا مارضتش اجيب سلفه علي مرتبي ده اللي ساترنا رحت لبتوع المواقف مارضيوش يدوني جنيه واحد عموله
أشرف : ما المشمش ما بقاش يجيب زي زمان طرحه قل وسعره في النازل بعد الامراض ماسرحت فيه وكمان المدعوق مشمش الجبل
ابو يوسف:ام يوسف لما لقت الزعل ركبني قعدت تهديني وتقولي بركه يا جامع ان جت منهم دول كانو بياخدوه متعبي اشي اقفاص وتكن واشي كراتين واطباق وشبك وصواريخ ومتكلف يعنى
أشرف : (معترضه) وتيجي لك الفاتورة بخصم مشال وعموله قد كده واكلينها والعه
ابو يوسف: نصحتني ام يوسف اروح البنك واجيب قرشين بالفايظ لحد ما نلم المحصول مع القرشين اللي في دفتر البت سعيده اللي عملناه لليوم ده
أشرف : وجبت زي ما قالت ام يوسف
ابو يوسف: واتهريت مشاوير واوراق وامضاءات علشان يضمنوا فلوسهم لو مادفعتش ياخدو القراطين اللي حيلتنا وجبت كل الورق اللي طلبوه حتي مضيت علي استلام الفلوس وقعدت استني القبض
الرجوع الى أعلى الصفحة اذهب الى الأسفل
http://aktrminakhwat.yoo7.com
islam
۩ ۩ المدير العام ۩ ۩
۩ ۩  المدير العام  ۩ ۩
avatar

ذكر الأوسمة :

عدد المساهمات : 370
السٌّمعَة : 23
تاريخ التسجيل : 30/07/2009
العمر : 29
الموقع : http://aktrminakhwat.yoo7.com

مُساهمةموضوع: رد: مسرحية عمار يا مشمش   الأربعاء 11 نوفمبر 2009, 5:20 pm

أشرف : وايه اللي حصل بعد كده

ابو يوسف: بتوع البنك انشغلو عني بلم مبلغ كبير قد كام ميه الف طلبهم بيه كبير من البهوات من البنك وهو في قريته

أشرف : وهو بيه كبير زي ده هيقعد في قريه

ابو يوسف: قريه سياحيه يا جاهل وبعت سواقه يشيل القرشينات والموظف المختص لحد عنده في مطرحه مرتاح علشان يمضي له بالاستلام

أشرف : ويمكن ما يدفعش زي البهوات الكبار اللي بنسمع عنهم بيهربوا لبره ومحدش بيقولهم تلت التلاته كام

ابو يوسف: ومتجيش الا على الغلابه اللى زينا ياخدوا الارض لو مدفعوش ده انا حتى طلبت قرشين الدفتر اللى قعدنا نحوش فيهم عمر كامل للظرف ده نجيب بيهم حاجه من حاجات الجهاز للبت عقبال ماتيجى فلوس السلفه بعد ما الواد التزم وجاب الدهب زى ماطلبناه على سلو بلدنا والتلت قوض وكل اللى طلبناه بالاصول والشهاده لله الراجل ماقصرش فى حاجه واهو عمال يستعجلنا

أشرف : ماهو مالوش دعوة باللى انتوا فيه وبعوايدنا هو كان من بلدنا .. ما انت برضه اجلته سنة

ابو يوسف:ماهو كان لازم عشان ميت داراحمد ،لازم نقدر ظرفهم ومنفرحش وهم فى حزن دى ابسط حقوق الجيرة والقرابة

أشرف :ياسيدى جبر الخواطر على الله هو حد بقى بيراعى خاطر حد دلوقتى واللى يموت يموت والحى ابقى من الميت .. تلاقيك انت اللى مصدقت وقلت بركة ياجامع .. ماهى مصايب قوم عند قوم فوائد

ابو يوسف:صحيح اش عرفك فى الاصول يا ابن امبارح ..المهم

قعدت مستنى حد من الفلاحين يتصرف ويسدد اى حاجة من اللى عليه للبنك بدل ما ياخدوا ارضه فى السنين الضنك دى اللى انتلف فيها امل المشمش ولاحدش يعرف الندوة سببها أيه

دخول احد الفلاحين مار عليهم قائلا:

(1) :هو رش الوزارة الفسدان ، بدل ما يرموه رزونا بيه وقبضوا تمنه ، هى حاجة بتخسر عند الحكومة

دخول شخص يدعى الثقافة عليهم ملوحا بايده كالمثقفين قائلا:

:هو دخول الشتا فى الصيف ، والصيف فى الشتا وتقب الاوزون .. الله يخرب بيت اللى خرمه

دخول احد الفلاحين مار عليهم قائلا:

:هما بتوع المناحل والنحل تقيل على نوار المشمش الخفيف بيوقعه

مهندس زراعى يقول: كل واحد ماشى بدماغه فى الرش والرى والعزيق والتسميد ، كل فلاح عامل نفسه خبير زراعى

واحد بذقن رافعا يده للسماء قائلا: الندوة دى غضب من ربنا ما حدش بيقول الحمد لله ، واللى صاب المشامش انتقامه سبحانه .. دا البعدا الجميّعة كتير منهم فطروا ديك السنة وهما بيجمعوا المشمش فى رمضان اللى جه فى عز الصيف .. ربنا بيديهم نعم لا تحصى من حيث لايدروا وهما بيبارزوه بالمعاصى الكفرة ، ولا حدش بيطلع الزكا الصح على المحصول .. كان لازم يحصل لهم كده واكتر من كده .. اللهم ارفع مقتك غضبك عنا ولا تاخذنا بذنبهم .

فلاح اخر يقول: مايكونش الصهاينه ولاد الكلب عملوا حاجه في الجو تلفو بيها امل المشمش زي مابوظو كل المحاصيل وكفايه اللي عملوه في الانتخابات اللي فاتت عندنا وانتو عارفين ازاي الله يحرقهم ببنزين وسخ علي اللي عاملينه فينا وفي فلسطين وماحدش قادر يلمهم البعدا .

ابو يوسف:دي شجره المشمش ما بقتش شجره الفقير زي زمان بقت سجره القادر حتي السجر خد مناعه من كتر الرش اللي ما بقاش يجيب نتيجه والدود بقي مالي المشمشه من اول الموسم مش مستني النقطه في نص ستة.

أشرف : والله صحيح علي راءيك

ابو يوسف: (بتنهيده) هييه الدين ده هم بالليل ومذلة بالنهاركل ما الواحد يفتكر الدين يدعي علي جماعته قطيعه تقع النسوان وشورتها لو صحت تاخر سنة ، فما بالك لو مصحتش !.

أشرف : لكن اهي البت دخلت وكانت ليلتها حلوة.

ابو يوسف: كانت زي القمر بعد ماجت من الكوافير وهي متمكيجه ولابسه الفستان والطرحه البيض فشر السجره الحمويه لما تلبس نوارها وتعقد عيونها الحمر وتطلع ورقها الاخضر.

أشرف : ربنا يعوض عليها ويرزقها بولاد كتير يملو عليها البيت

ابو يوسف: ده حتي البت سعيده اتحكمت علي فرقه تحيي ليلتها بعد الكيل ما طفح والجيب مابقاش فيه ولا مليم اتصرفت في قرشين من ابو سويلم هو معقول ازعلها في ليله زي دي جبت فرقه البلد فرقه الجوع كافر.

أشرف : أهي لمت شويه من عوطليه البلد جابو طبله وكام عده من بتوع الافراح والهيصه وصوتهم ما بيتعرفش من الهيصه وهما اوفر من غيرهم ..وعقبال غيرهم اللى بايعين جتتهم ولا بيحوقش فيهم حاجة ومرزين البلد بالبلاوى كلها بلطجة ومخدرات وهباب ازرق .

ابو يوسف: سيبك من السيرة الغم دا حتى الصيليات والدكاترة قلدوهم وبرخصة (ويعود متذكرا فرح سعيدة في حين يوضع كرسين في الجانب الايمن ويظهر عريس وعروسه وزغاريط وطبل )

ع الزراعيه انا رحت اقابل حبيبي ع الزراعيه يارب اقابل حبيبي

العلاميه يا احنا ولا حد قدنا

ابو يوسف: (مشاركا) العريس والعروسه والجدعان الجدعان قوي اللي شرفوني الليله اللي جميلهم علي راسي من فوق والصبحه الطاهره دي وانا وانت ورقصني ياجدع

ينسحب الفرح بزفه الدخلة ويعود بعض الرجال رافعين شاشة :

بص شوف العرض بيعمل ايه

ونعود للحقل

أشرف :الا قولى انتو ما عملتوش فطير ليه زى بقية الناس

ابو يوسف: فطير ايه ياعم اشرف عريسها من بره البلد ، ودى عادة خفت فى العمار..دا بيخرب البيت والعملية كانت ناشفة على الاخر، واهه برضه راح لها حقها ناشف احسن لها والحريم مابيفوتوش حاجة خايفة من معايرتها وهاين عاليها تقلع حيطان البيت وتديهالها بعد الحاجات العجيبة اللى بقت تنجاب، وانت كده كده مش هتعجب كل الناس.

أشرف : اهو كان الواحد هيتحصل على واحة عشان ينوعد ويدوق عمايلكو وكترة سمنتكم

ابو يوسف:بلاش تكرنى باللى عملته واللى نقص من حلة العرسان لما سلمنا القط مفتاح القرار وضحكت على الواد يوسف وهبرت حمامة يامفترى.. فطيرة ايه اللى بتدور عليها يا ابو فطيرة دا يانى كاعع دم قلبى منبيش جنح يوحد ربنا.

أشرف : هو انت لسة فاكر..دا انت قلبك اسود،ماهو لازم عشان الواحد يتوعد، مش فرح برضة .

ابو يوسف: هو احنا هياخدنا الكلام ونسيب اللي ورانا اهو الواحد بيضحي باجازاته طول السنه علشان اساعدك في هجمه المشامش غير التزويغ علي حس زمايلي

أشرف : ماهو الخير بيعم عليهم من الزيارات من كراتين وخلافه

ابو يوسف: بس ربنا يكرمنا والسويقه تكون حلوه النهارده مش هيبقي طرح وسعر

أشرف : بس عب الملأه والاصالي طارح بحق ربنا بس سعره وحش

ابو يوسف: ماهو من ساعه ماكل واحد عمل فيها معلم وعمل سويقه وفرقوا التجار ونزلو مشمش الجبل وسوقوه في بلد المشمش بدل سوق العبور واسعاره في النازل الله يهدهم البعدا الواحد هيلاقيها منين ولا منين منهم ولا من التعب في الارض ولا من المشمش اللي انتدي ولا من السجر اللي بينشف علي عوده الواحد كانه عامل جمعيه طول السنه وبيقبضها اخر نفر في المشمش وناقصه كمان

أشرف : وباقي عليه ليه ده السجره من غير تمر بلاش منها الشجره من غير تمر ياشوم زرعتها الله عليك يابو حجاج

ابو يوسف: الواحد فكر في تقليعه وتعميره برتقال او زرعها خضار لكن صعب عليا فيه اللي من عمري واللي فيه ريحه ابويا الحج يوسف دا العمار من يوم مابقت عمار وحل العمار بعد الخراب والمشمش عنوانها لو راح منها تبقي عمار ولا هترجع خراب زي ماكانت ده ياما جاب فلوس زمان لدرجه ان جناين كتير كانت بتنباع لسنين وهي خشب من الطرح اللي فات وا ديني جبت اللازايق المطعومه من عند اسماعيل الزقزوق مكان المشمش .

طلع اشرف علي النقال ووقف ابو يوسف علي الدوالي

بشري مشيره ناحيه اشرف قائلة: ياواد يا رغوه المشمشه اللي تفلت منك نط وراها دي مش أي مشمشه قبل ما تنقع وتتكسر وتروح مع المستوي واكل الاغربه والوطاويط ببلاش

أشرف : بطلي يابت مابقاش غيرك

ابو يوسف: لأشرف: يا اشرف اجمع الشوشه بشويش لواحده تنجرح وسيب اللي في الدوالي ده لسه بدري عليه

يوسف تحت النقال ينظر اليه ابيه وهو يمسك المشمش

ابو يوسف صائحا:تعالي شوفي يام يوسف وانبسطي ابنك اسم الله عليه بيفعص في المشمش علشان يبيعه في المستوي ويزود اللي في حصالتك وحصالته احنا هنجمع في الاخر كل حاجه علشان نكفي فلوس البنك ويارب يقضو بدل ماياخدو القراطين اللي حيلتنا وفوقهم العجلة.

اشرف ينقل النقال بعصبية

ابو يوسف يكمل بعصبية :حاسب يا اشرف انت راخر رجل النقال هتفسخ اللزيقه شايف اديك فعصت المشمش اللي في القنايه برجلك

يوسفL: (محتجا) طيب ماليش دعوه انا عايز جنيه اجيب شيبسي وقلبظ من عند وداد

ابو يوسف: اية الحاجات المقرفة انت ناقص وجع بطن انت مش لسة فاطر انت هترمرم ( بعصبية) روح غور من وشى واخفى من قدامى لأمك دانت واد مخك جزمة قديمة 0

أشرف : الله يرحم ايام زمان لما نروح نشترى الموقيلى والسودانى والملبن والكرملة من خالتى صديقة بالمشمش كانت ايام 0

ابو يوسف: ايام اية ياابن امبارح ، داانت مواليد لولاكى 0

أشرف : اية ياعمنا انا اوعى على فحت البحر0

ابو يوسف: هرى بقى ، هو الكلام علية جمرك ، واد يااشرف المشمشمة المستوية دى متحطهاش فى عبك لتبوز باقى عبك0

أشرف : (ضاجرا) حاضر يابو يوسف .. ياساتر الشمس طالعة ولعة كدة لية دى ولا عز بؤونة .. بت يابشرى ناولينى القلة ارطب على نفسى من حر جهنم ده ..(يسترد اشرف موجها كلامه ايضا لبشرى ) دخانك عمانى ، مالك ولعتك مطفية كده ، ولعى الركية واعملى دور شاى.. شاى برغوة بدل من شاى الترمس الماسخ ده.

ابو يوسف: انت مش لسة طافح شاى، هو انت ناقص حرقة قلب وحموضة 0

أشرف : قول ياباسط ، الواحد لو بيمشى ويصدق كل اللى بنسمعه من الدكاترة يشوفله موته احسن.. ماهو استشاريين الصدر حريقة فى السجاير ، والمشايخ كل جمعة بتزيد وتعيد ومبيعملوش حاجة من اللى بيقولوه ، وعندك ابصر فراخ بيضا بتاكل حبوب منع الحمل وبلاوى كتير ، والبقر المجنون والجاموس الفطيس ولحم الحمير وخضار الصوب المرشوش والفاكهة المتهرمنة اللى قد كده..وطعمها ماسخ وبتضرب بسرعة الواحد لو مشى ورا الكلام ده لا هياكل ولاهيشرب 0

ابو يوسف: على رأيك هو اية اللى بقى على حالة وزى زمان ، دا حتى المشمش هرمونه فى الجبل ونزلوه مع بتعنا واهو مكتسح السوق والزباين ميعرفوش الفرق بينهم الا بعد الأكل ، ولو قعد عندهم بيضرب ، ويجيب نزلات معوية ام مشمش العمار وفى ارضها زى الفل فى التوب 0

أشرف : ياعم سيبك ما اهو انا واخد دبلوم صنايع من خمس سنين وشغال مزارع مرة عندك وعند غيرك فى المانجة واى حاجة بتجيب فلوس علشان احس انى بنى ادم وباجيب قرش بدل ما افضل عاله .. فين كل اللى اتعلمته انا والمؤهلات العليا .. زمان كان اللى بياخد ابتدائية يبقى افندى قد الدنيا اما دلوقتى دراسات عليا ومش لاقيين شغل.. ياعم بلاش وجع دماغ وكبر الجمجمة وصلى على النبى الهادى.. ماتقلبش علىّ المواجع .

ابو يوسف:بتقاسى ياواد مقاسى

أشرف :(مستهزئا) مقاسى واحد واربعين

ابو يوسف:جول ياعم جابر

بعدما احضرت بشرى له شفشق ماء قال لها(بتريقة): تشربى من مية زمزم انا وانتى يارب

بشرى (بتهكم) :انا وانت .. يا اخويا هو انت هتشوف هناك ابدا طيب صلى الاول ، هو انت بتركعها حتى فى يوم الجمعة

أشرف :ما انا يا بت بصلى على النبى

بشرى: طيب يا فالح هى المواضيع دى فيها تريقة .. ربنا ياخدك ويرحنا منك

ابو يوسف:بطلوا وش هو انتم دايما ناقر ونقير خليكو فى اللى انتو فيه،ونقى يا بشرى اللى وقع تحت السيبة وبطلوا رغى النسوان ده

اشرف ماسكا شفشق الماء موجه كلامه لابويوسف:هو ايه ده يا ابويوسف فين القلة تلاجتنا البلدى والفقيرى ، زى ماجيبين شعلة تطبخوا عليها بدل الكانون وعيش طابونة هو فيه احلى من اكل الكانون والرغيف البلدى، عشان كده كان الواحد من بتوع زمان بيقعد على مشنة العيش بيجيب اجلها .. انما دلوقتى العالم اتسممت فى اكلتها

ابو يوسف: وانت اصمله نفسك مسدودة ومابتحشش فى الاكل حش بشعلة ولا حتى نئ

أشرف :ربنا يسامحك .. دا انت باصصلى فى اللقمة اللى بتأكاهلى بقى .. الا بأقول ايه مفيش اى حاجة النهاردة نمشى بها حالنا احسن المية نشفت على الآخر.. ربنا يبحبحها عليك.

ابو يوسف: يا اخويا مستعجل ليه قبل آخر جمعة هتاخد حقك اربع وعشرين قيراط وكلها يومين ونشقط التايهه بالجريدة .. ادعى ربنا تكون السويقة حلوة .. لأحسن حسن سوق ولا حسن بضاعة

أشرف : ما انت عارف ان الايام دى ايام هباصة والمشمش بالتراب.

ابو يوسف:فال الله ولا فالك هاروح سويقة العلامية احسن ، بيقولوا اسعارها حلوة .. اياك يكون حظ البت سعيدة بس مايكونش وشها نحس زى امها .. باين عليها

أشرف :ياام ييييييوسف سامعه جوزك بيقول ايه عليك .. ايه رأيك هتحينى والا اكون رسول محبة الليلة دىوانت عارفنى مايتبلش فى بقى فولة.

ابو يوسف:بطل ياواد هتودينا فى داهية هاشوفك بكم بريزة .

متسول يظهرعلى يمين المسرح قائلا :ربنا يعودها عليكم بالخير

أشرف : ده عليه صحة يشد بها حلوة ووداير يشحت .

ابو يوسف:ماهى بقت صنعة وحرفة مريحة ومربحة .. بيدور على البلاد اللى فيها مواسم والفلوس بتجرى فى ادين الناس وبيشحت فيها .. ويدوه ماداموا بترجوا كرم ربنا فى محصولهم وزكاة عنه

أشرف : سمعت عن الشحاتة اللى ماتت ولاقوا فى اضوتها كام ألف جنية .. طب كانت تنزهه بهم نفسها بالليل بدل ما يكون مال الكنزى للنزهى اذا كان عندها نزهى.

ينادى ابو يوسف على بشرى: اديله الشوية الى فى البوقطى اللى لميته الصبح .(يتوجه لاشرف بالكلام) خد ياواد يارغوة اكسر المشمشة الحموية باسنانك انت لسة بصحتك

يكسرها اشرف ويأكلها يوبخه: كلتها ياطفس

أشرف : هى اسنانى ببلاش ، دور على طقم اسنانك

يوسفL: (لبشرى بعيدا عنهم) تيجى يلا نلم النقى ونعمله دقة .

بشرى: حاضر ياحبيبى هاخلص اللى ورايا وهاعمل كل اللى انت عاوزه .

ابو يوسف:يلا يا اشرف فضى عبك عشان نعبى بقية الغلقان ونغطيهم ونعبى المستوى فى المشنات واروح ابيعه انا والبت بشرى فى السويقة (يوجه كلامه لبشرى) خدى يابشرى وششى الغلقان والمقاطف بتورتين من البز(ثم يتسأل عندما رأى مشنة المستوى) امال ايه المشمشة الكبيرة اللى فى المستوى .. منين .

بشرى:دى من لزيقة البز اللى على العارضة

ابو يوسف: هو بدأ يسقط ، دا لسه نشوى سيبوه يسقط محدش يجمعها عشان ما يضعفهاش.. ويلا يا بت يابشرى شهلى وشيلى.

(ثم يتذكر امر ويوجهه كلامه لأشرف) :الا قولى يا اشرف عمل ايه عبد العزيز لما موردش للمصنع كمية العقد

أشرف : كلمه فى التليفون ولقى مدير المصنع شايط وقاله اسمع يا عبد العزيز احنا متفقين على توريد اتنين طن يوميا وبقالك اسبوع ماوردتش كيلو واحد انا هوقع عليك الشرط الجزائى تلتلاف جنية كل يوم.

ابو يوسف: ورد عليه وقال ايه .

أشرف :قاله بص ياباشا الاهلى بيلاعب المحلة فى استاد القاهرة وهازم خمسة صفر رد عليه ياعب العزيز انت فيه ولا فى ايه.

ابو يوسف:صحيح وقاله ايه كمل الحكاية على بعضها وبطل مط عشان نلحق السويقة.

أشرف : قاله وباقى من زمن الماتش خمس دقائق ومدرب المحلة بيقول انا هاهزم الاهلى .. الكلام ده منطقى ياباشا .. قاله مش منطقى طبعا بس .. قاطعه وقاله مابسش المشمش هنا على ارضه باتنين جنيه واحنا واخدينه بمية وتمانين صاغ الكلام ده منطقى ياباشا .. ضحك مدير المصنع وقرر ان يزيد السعر لمتين وعشرين قرش للكيلو.

ابو يوسف: الحمد لله وباقى الناس عاملين ايه فى التوريد للمصانع ن دى كانت حرب ولا حرب الانتخابات وده بينزل سعر الكيلو عن غيره عشان يلطش مناقصة التوريد.

بشرى تشيل الطبق بالغلقان وابو يوسف مشنة المستوى ، ويمسك يوسف فى جليبة بشرى مصمما على ان يذهب معها مع تصنع البكاء

ابو يوسف: يا ابنى المشوار طويل واحنا فى عز القيالة والجو صهد ولا قبة الفرن واحنا هنمشى على خطوتك واحنا عاوزين نقلب ونرجع عشان الادوار التانية ، خلى ربنا يكرمنا النهاردة ومش ناقصة لعب العيال ده .

يتمسك كثر بجلبية بشرى مع ازدياد جرعة البكاء

بشرى: والنبى ياابويوسف خليه يجى معانا وهيمد ولاحتى يجرى.

ابو يوسف:علية الصلاة والسلام ، هى كانت نقصاك يسى يوسف .. خليك ياحبيبى مع امك هتطبخ وهتديك حتة لحمة والكبدة اللى بتحبها وخد الجنيه اللى انت عاوزه هات بيه اللى تحبه.

ترك جلبابها واخذ يتمرغ على الارض

ابو يوسف:طب هاتى النقز يا بت يابشرى لما نشوف اخرة الدلع والعند ايه

يستمر فى بكاءه مع ازدياده

ابو يوسف:طب قوم يا ابن......... يلا البس شبشبك ويلا...

يقوم منبسط الاسارير ولا اثر لاى دمعة على خده .. ضاحكا.

ابو يوسف:طب ياعم يوسف الحساب يجمع، ابقى دور على اللى يديك ويزود فى حصالتك وهوصى امك متدكش من وراى.

أشرف : (يودعهم) ربنا معاكم ، ربك مع المنكسرين جابر

يلتفت اليه ابو يوسف مبتسما ويمضى بلا تعقيب
المشهد الثالث


يدخل الى السويقة من الشمال يقابل نفيسة تاجرة مشمش تشترى المستوى، فى المنتصف قبانى وفى اليمين كشك حلويات وسجائر

نفيسة: ورينى ياابو يوسف شوية المشمش اللى معاك .

ابو يوسف: ياخالة نفيسة مش هتقدرى عليهم دا بز اسماعيل وحباية حموية نقايتها لوز .. لا تكونى فكراه مشمش جبلاوى ده مشمش عماراوى اصيل .

نفيسة: طب هات شوية المستوى دول اللى على ايدك.

ابو يوسف: وبعدين يا خالة انا مش فاضى.

نفيسة: يعنى مش عاوز تنفعنى باى حاجة كل سنة وانت طيب.

ابو يوسف: يا خالة ما انتى عارفة انا مش عاوز حد يكسب من ورايا، نفسى اودى كل مشمشة للى بيكلوها وبالتمن اللى بيشتروه بيه .. انا وراى بنك وانت عارفة يعنى ايه بنك على راى اللى قال:

ياعينى عليك يامشمش اللى دود على السجررمناه والباقى جبناه .. يامشمش صاحبه محبوس وعايز فلوس.

نفيسة:(ممسكة مشنة المستوى بقوة) طب صلى على النبى.

ابو يوسف:الف صلى عليك يانبى ، خلصينى بقى .

نفيسة: هى كلمة واحدة بس ، خمسة جنية .

ابو يوسف:يفتح الله دا انا اخلى ام يوسف تخلله ولا تعصره ، اوعى سيبى المشنة .

نفيسة: روح يااخويا اجرى يا ابن آدم جرى الوحوش غير رزقك لم تحوش.

ابو يوسف:متوجعيش قلبى وسبينى اروح لحالى وراى ميت عاوز يتكفن.

يمشى من امامها حاملا المشنة منها

نفيسة: طب هقولك قوالة تانية .. استنى ومش هتخسر انت حمقى كده ليه .

فى وسط المسرح يقابل احد المزارعين بعدما باع مشمشه فى السويقة

ابو يوسف: قال ايه اخبار السويقة النهاردة ياشعبان .

شعبان :ما انت عارف يا ابو يوسف ايام الهباصة والمشمش بالتراب ومشمش الجبل والايام الهباب اللى بقينا عايشنها ، هى الناس لاقيه تاكل عشان تـاكل فاكهه

ابو يوسف: بس المشمش حاجة تانية..موسمه قصير هو دا اللى بيديله قيمته .

شعبان :قصر ايه ما هو مشمش الجبل طوله ورطرطه هنا وهنا ، دا غير التلاجات.

ابو يوسف: ياراجل برضة مشمش العمار فاكهه حافظة مكانتها عند الناس حاجة تانية، دا انا مرة بودى زيارة للمدير عشان خدمة كده.. بصرحة انكسفت اروح بقفص مشمش ، هيقول ماهو ببلاش من عندهم وقلت ايه قلة القيمة دى.

شعبان : وعملت ايه .

ابو يوسف:جبت قفص تفاح من اللى قلبك يحبه،وقفص تين وعنب،حاجات تيجى بمتين جنية ورحلته تصور قالى ايه.

شعبان :قالك ايه يا فتك .

ابو يوسف:قاللى بقى جبت كل ده عشان ما تجبليش مشمشك النضيف.. اه يا بخيل .. انا وقفت مبلول ..عرقى مرقى ..بقى كل التكلفة دى عشان حاجة ببلاش مش هتكلفنى حاجة .

شعبان :يا راجل بلاش فشر بقى هو الكلام عليه جمرك.

ابو يوسف:طب علىّ الطلاق هو دا اللى حصل .

شعبان :صادق هو انت بتعرف تكذب ، انا كنت بانكشك .

ابو يوسف: بحسب هتقول حاجة تانية ، الا قولى ايه اخبار شروتك .

شعبان : ربنا مكرمش واهى خسرانة النص ، مش بعيد يضيع فيها قيراطين .

ابو يوسف: مش قالولك جيب حد من عندك يعين المشمش ويشوف فيه كم تكنة ، لكن اخدت على تعيين الحاج احمد اللى جابه والاسعار كمان خانتك .

شعبان : الحاج نيلة منه لله، دا حتى عبد الصمد مرضيش ينزل فى البيعة شوية ، ورأسه والف جزمة قديمة يسلم الشيك للمحامى ، وكمان امسك امبارح عيلين صايعين سارقين تلت تمن من البز اللى فى الشروة فى الفجرية.

ابو يوسف:البلد اتملت اوساخ مش عارف ظروفهم ولا تربيتهم ولا سيبان اهلهم لهم ..اكيد كانوا هيبيعوهم ويجيبوا بتمنهم بانجو ، ماهو بقى موضة وكتير بيشربوه وبيتوزع فى الغيطان والترب ومفيش موعظة من الاموات ، ربنا يسخطهم وياخدهم البعدا.. لكن صحيح الموت بينقى الكويسين ، والاكادا بقى بيتشرب فى الافراح عينى عينك يابجاحتهم .

شعبان :سيبك وروح ربنا يسهلك ابواب الرزق كلها فى وشك ما الحال من بعضه ويعينك على لم فلوس البنك ..دا سمعت ميكرون من قيمة شوية بيقول :ياااااجااااابر.. يا اهل دهر التمساح ابعتو مشمش، ياجماعة البوش ويادار عباطة ابعتوا مشمش .. عندنا تجار من المنصورة عايزين طن مشمش ..يالا تعالوا

ابو يوسف:اهو كلام.. انا معايا شوية حموى وبز اسماعيل هتمنهم الاول عند احمد وبعدين ابيعهم فى سويق العلامية بيقولوا عليها حلوة .. ولا على ايه لسه حجاج فاصلهم لى .

شعبان :ابعد عن الراجل ده ..دا فطاس .

ابو يوسف: ليه دا فاصلهم بسبعين جنيه غير الحموى.

شعبان :ده بيربط دماغك يا خايب لابيبع ولا بيشترى ، دا عايش على اللى فات .

ابو يوسف:ياعم بطل بقى ، هى ناقصة انا هاروح وربنا يكرمنى وخلاص .

بشرى:يلا يا ابو يوسف انا راسى ولعت من الشيلة والحر، هو دا وقت كلام مش انت كنت مستعجل، دا حتى يوسف لاوشه زنهر من الحر وقال بتقولوا ان النسوان هى اللى بترغى .

ابو يوسف:اخرسى يا بت، ولمى لسانك مابقاش غيرك يلا اامشى.

بشرى: اما ياابو يوسف لو الواحد يلاقى بهوات بعربية جايين يشتروا مشمش ويشلوا الشروة دى دى تبقى لقطة .

ابو يوسف:يابت كل اللى جايين لهنا قحطانين ، مفكرين انهم هييجوا العمار وياخدوا المشمش رخص التراب..اللى انت بتقولى عليهم بيلقطوهم بعربيتهم الفخمة اللى قاعدين بغلقان على رؤؤس غيطانهم بغلقان مشمش على البحر والطريق .

يتجهوا لمزاد المشمش حوله عدد من التجار وعبد العزيز امامه القبانى يزن به غلقان المشمش رافعا عصاه فى اتجاه الغلقان .

ابو يوسف: يلا ياعم عبد العزيز ربنما يكرمنا على ايديك النهاردة ، ونلم فلوس البنك .. احسن يتلموا على القيراطين ونقعد يامولاى كما خلقتنى ، وانت عارف الارض عرض وهازعل الحاج يوسف فى تربته انى معرفتش احافظ على ارضه مش ازودها.

عبد العزيز:ربنا يكرم يا ابو يوسف هو الواحد نفسه فى ايه الخيرللكل( ثم يرفع عصاه نحو الغلقان قائلا) يلا يامعلمين على الشوية البز ، والشوية الحموى (فصال بينهم) .. لسة بدرى يلا يامعلمين حد يزود حبة بز محترمة وحبة حموية نقيتها لوز .. تتاكل من جوه وبره .. حد يزود ..حد يزود..مبروك عليك ياعبد المنصف (يتجه نحو ابو يوسف) خلاص ياابو يوسف نباركله ولا ايه رايك ، ه
الرجوع الى أعلى الصفحة اذهب الى الأسفل
http://aktrminakhwat.yoo7.com
islam
۩ ۩ المدير العام ۩ ۩
۩ ۩  المدير العام  ۩ ۩
avatar

ذكر الأوسمة :

عدد المساهمات : 370
السٌّمعَة : 23
تاريخ التسجيل : 30/07/2009
العمر : 29
الموقع : http://aktrminakhwat.yoo7.com

مُساهمةموضوع: رد: مسرحية عمار يا مشمش   الأربعاء 11 نوفمبر 2009, 5:23 pm

ما احلاها عيشة الفلاح متطمن قلبه مرتاح
يتمرغ يتمرغ على أرض مراح والخيمة الزرقا ساتراه
ياه ياه يا ه ياه ياه ياه
دي القعدة وياّ الخلان والقلب مزقطط فرحان
تثاقلها بجنة رضوان يا هناه اللي الخل معاه
ياه ياه
دي الشكوى عمره ما قالهاش ان لاقى والا ما لاقاش
والدنيا بقرشين ما تسواش طول ما هو اللي حبه حداه
ياه ياه
يا ريت اعيانك جهلوك وعزالهم شالوه وهجروك
لمداين مزروعة شوك ياما بكرا يقولوا يا ندماه
ياه ياه

***



كلمات: بيرم التونسي
الحان: محمد عبد الوهاب

_________________
الرجوع الى أعلى الصفحة اذهب الى الأسفل
http://aktrminakhwat.yoo7.com
 
مسرحية عمار يا مشمش
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
اكثر من اخوات :: المنتدى الثقافي :: القصص الشعبي-
انتقل الى: